ປະເທດເຢຍລະມັນ / Germany

ວັດທະນະທຳຂອງເຢຍລະມັນແມ່ນການປະສົມປະສານທີ່ມີຄວາມລຶກຊຶ້ງຂອງຄວາມຫຼາກຫຼາຍຂອງພາກພື້ນ, ມໍຣະດົກທາງປະຫວັດສາດ, , ແລະ ການປະດິດຄິດຄົ້ນສະໄໝໃໝ່. ວັດທະນະທຳນີ້ໄດ້ຮັບອິດທິພົນຈາກການມີສ່ວນຮ່ວມ ໃນດ້ານປັນຍາ, ສິລະປະ ແລະ ວິທະຍາສາດ ມາຫຼາຍສະຕະວັດ. ປະຊາກອນເຢຍລະມັນໂດຍທົ່ວໄປມີຄວາມເປັນລະບຽບ, ຕົງເວລາ, ແລະ ຮັບຜິດຊອບສູງ, ເຊິງສະທ້ອນອອກໃນການເຮັດວຽກ ແລະ ລະບົບສັງຄົມຂອງພວກເຂົາ. ພວກເຂົາເອົາໃຈໃສ່ຄຸນນະພາບຂອງຊີວິດ, ຄວາມຍືນຍົງທາງສິ່ງແວດລ້ອມ ແລະ ການອະນຸລັກວັດທະນະທຳ. ໃນຊີວິດປະຈຳວັນ, ຄົນເຢຍລະມັນມັກຄວາມເປັນສ່ວນຕົວ, ການສື່ສານຢ່າງຊັດເຈນ ແລະ ຄວາມເຄົາລົບເຊິ່ງກັນແລະກັນ. ສ່ວນໃນລະບົບການສຶກສາ ແລະ ສາທາລະນະສຸກ ເຢຍລະມັນໄດ້ໃຫ້ຄວາມສຳຄັນສູງ.

ນັກປັນຍາເຢຍລະມັນຊື່ດັງຫຼາຍຄົນເຊັ່ນ Immanuel Kant, Friedrich Nietzsche ແລະ Karl Marx, ລວມທັງນັກດົນຕີ Classic ໃນປະຫວັດສາດຢ່າງ Bach, Beethoven ແລະ Wagner. ວັນນະຄະດີ ແລະ ສິລະປະມີບົດບາດສຳຄັນໃນອົງປະກອບຂອງວັດທະນະທຳເຢຍລະມັນ, ດ້ວຍນັກປະພັນທີ່ມີຊື່ສຽງເຊັ່ນ Goethe ແລະ Franz Kafka. ສ່ວນໃນຄວາມທັນສະໄຫມ, ເຢຍລະມັນແມ່ນຜູ້ນຳໃນດ້ານສິ່ງແວດລ້ອມ, ວິສາຫະກິດ ແລະ ເທັກໂນໂລຊີ, ມີຍີ່ຫໍ້ດັງໆເຊັ່ນ BMW, Mercedes-Benz, Siemens ແລະ Bosch.

ໃນງານປະເພນີພື້ນເມືອງທີ່ເຢຍລະມັນມັກຈັດຂຶ້ນແຕ່ລະມີກໍ່ຈະມີ "Oktoberfest" ທີ່ Munich, "Karneval" ທີ່ Cologne, ແລະ ຕະຫຼາດຄຣິດສະມາດທົ່ວປະເທດ. ອາຫານເຢຍລະມັນມັກເປັນຈານໜັກ ແລະ ມີຄວາມແຕກຕ່າງຕາມພາກພື້ນ, ໂດຍມີຈານຍອດນິຍົມເຊັ່ນ ໄສ້ກອກ (Wurst), schnitzel, ແລະ ເຂົ້າຈີ່ເຢຍລະມັນຫຼາຍກວ່າ 300 ປະເພດ. ກິລາແມ່ນສ່ວນຫນຶ່ງທີ່ຂາດບໍ່ໄດ້, ໂດຍສະເພາະບານເຕະ ທີ່ໄດ້ຮັບຄວາມນິຍົມຫຼາຍທີ່ສຸດ. ທີມຊາດເຢຍລະມັນເຄີຍຊະນະບານໂລກຫຼາຍຄັ້ງ. ຄວາມປະສົມປະສານລະຫວ່າງປະເພນີເກົ່າ ແລະ ຄວາມທັນສະໄໝເຮັດໃຫ້ວັດທະນະທຳເຢຍລະມັນມີຄວາມເຂັ້ມແຂງ, ມີຄວາມຫຼາກຫຼາຍ ແລະ ມີຄວາມໄວໃນການປັບຕົວໃນໂລກທັນສະໄໝ.

ເຢຍລະມັນຍັງເປັນຈຸດໝາຍປາຍທາງທີ່ນິຍົມຫຼາຍສໍາລັບນັກສຶກສາຕ່າງປະເທດ. ມະຫາວິທະຍາໄລຂອງເຂົາໂດດເດັ່ນດ້ວຍມາດຕະຖານສູງ, ໂຄງການວິໄຈຂັ້ນສູງ ແລະ ຫຼັກສູດຫຼາຍແຫ່ງທີ່ສອນທັງໃນພາສາເຢຍລະມັນ ແລະພາສາອັງກິດ. ມະຫາວິທະຍາໄລລັດຈຳນວນຫຼາຍບໍ່ເກັບຄ່າຮຽນ ຫຼື ເກັບບໍ່ຫຼາຍ ບໍ່ວ່າຈະເປັນນັກສຶກສາຕ່າງຊາດກໍຕາມ, ເຮັດໃຫ້ການສຶກສາໃນເຢຍລະມັນເຂົ້າເຖິງໄດ້ງ່າຍ. ສະຖາບັນຊື່ດັງເຊັ່ນ Technical University of Munich, Heidelberg University ແລະ LMU Munich ໄດ້ຮັບການຍອມຮັບໃນລະດັບໂລກ. ການສຶກສາໃນປະເທດນີ້ເປີດກວ້າງ, ໃຫ້ຄວາມເປັນອິດສະຫຼະ ແລະ ຄວາມຄິດສ້າງສັນ. ນັກສຶກສາຢູ່ໃນສິ່ງແວດລ້ອມທີ່ປອດໄພ, ມີລະບົບຂົນສົ່ງສາທາລະນະທີ່ດີ ແລະ ຈະໄດ້ຮັບປະສົບການດ້ານວັດທະນະທຳຢ່າງຫຼາກຫຼາຍລະຫວ່າງການຮຽນ.

ສະພາບອາກາດໃນເຢຍລະມັນແຕກຕ່າງຈາກລາວຫຼາຍ, ປະເທດນີ້ມີ 4 ລະດູການທີ່ແຕກຕ່າງກັນຄື: ລະດູໃບໄມ້ປົ່ງ, ລະດູຮ້ອນ, ລະດູໃບໄມ້ລົ່ນ ແລະ ລະດູໜາວ, ໂດຍແຕ່ລະດູມີ ອາກາດ ແລະ ອຸນຫະພູມທີ່ຕ່າງກັນ, ດັ່ງນັ້ນນັກຮຽນລາວທີ່ມີແຜນຈະໄປສຶກສາຕໍ່ທີ່ນັ້ນຄວນຈັດການເຕັມພ້ອມສຳລັບການປ່ຽນແປງຂອງດິນຟ້າອາກາດ; ໃນລະດູໃບໄມ້ປົ່ງ (ເດືອນມີນາ–ພຶດສະພາ) ມັກຈະເຢັນ ແລະ ຝົນຕົກເລັກນ້ອຍ ດ້ວຍອຸນຫະພູມປະມານ 8-18 ອົງສາ, ລະດູຮ້ອນ (ເດືອນມິຖຸນາ-ສິງຫາ) ມີອາກາດອົບເອົ້າ ຫຼື ຮ້ອນ ດ້ວຍອຸນຫະພູມປະມານ 20-35 ອົງສາ, ລະດູໃບໄມ້ລົ່ນ (ກັນຍາ-ພະຈິກ) ເປັນລະດູທີ່ເຢັນ ແລະ ງາມ ອຸນຫະພູມຢູ່ໃນຊ່ວງ 10-18 ອົງສາ, ແລະ ລະດູໜາວ (ທັນວາ-ກຸມພາ) ແມ່ນໜາວຫຼາຍ, ບາງເທື່ອອາດຈະມີຫິມະຕົກ ແລະ ມີອຸນຫະພູມຢູ່ລະຫວ່າງ -5 ຫາ 5 ອົງສາ, ເຊິ່ງນັກຮຽນຈຳເປັນຕ້ອງມີເສື້ອຜ້າຫນາ, ຖົງມື, ໝວກ ແລະ ອຸປະກອນອຸ່ນໆເພື່ອຄຸ້ມກັນອາກາດເວລາຢູ່ຂ້າງນອກ, ພິເສດສໍາລັບຄົນທີ່ບໍ່ເຄີຍພົບກັບອາກາດໜາວຫຼາຍມາກ່ອນ.